A nosa actividade está cada vez máis sometida a regulacións e prohibicións. É importante que todo o colectivo escalador as coñezamos, tanto para ser conscientes de cales son os valores naturais que se protexen dentro do noso terreo de xogo, como para non incurrir nunha ilegalidade.
En Galicia, á marxe doutras normativas aplicables e da situación coa propiedade dos terreos onde se atopan as áreas de escalada, existen diversas figuras de protección medioambiental que afectan a varias zonas.
Preto do 50% das zonas de escalada de Galicia están situadas en espazos naturais protexidos.
A escalada podería estar suxeita a unha autorización de carácter individual e nominal, truncando as dinámicas habituais da nosa actividade.
Ademais, poden chegar a producirse restricións ou prohibicións de acceso ás zonas afectadas.
O noso equipo está formado por persoas voluntarias repartidas por toda a xeografía galega. Poderás atoparnos en Vigo, Pontevedra, Santiago, A Rúa de Petín, Bueu, Ourense, Negreira, A Coruña, Betanzos, Mugardos, Ferrol…
